سيول البيروقراطية فى سيناء

سيول البيروقراطية فى سينـــــاء

ــــــــــــــــــــــــــــــــــــــــــــــــــ ـ

رقم الموضوع :- ( 32)
التاريــــــــخ :- الأحد 21 فراير 2010
أسم الموضوع :- سيول البيروقراطية فى سيناء .
أسم الكاتب :- صــلاح إدريــس
التصنيـــــف :- مقال
******************************
تم نشر هذه المقالة فى جريدة ( المصرى اليوم ) عدد الجمعة 20 فبراير 2010 .. ولكن مختصرة بعض الشىء لضررورة الألتزام المحدد لعدد الكلمات فى المقالات .
*****************************
فيه حاجة غايظانى قوى .. علشان كده لازم أقولها بالبلدى الفصيح .. والحكاية دى بتحصل فى دهب وكل مدن سيناء ... ( وفى كل مدن مصر المحروسة .. ومايحدث فى سيناء هو مثال عايشه بنفسى ) .. يوجد مشروع قومى متبنياه الدولة من أوائل التسعينات .. بتعمير سيناء بتوطين مئات الآلاف من الشباب المصرى فيها .. علشان يكونوا عائلات ..و يعملوا حائط بشرى يمنع عننا أى إعتداء من الجيران .. وتتلغى خطة الوطن البديل اللى إسرائيل بتلعب عليها وبتخطط لها من سنين بتوفير وطن بديل للفلسطينيين فى سيناء المصرية الفاضية لغاية دلوقت !! ( راجعوا تحقيق جريدة المصرى اليوم بتفاصيل هذا الموضوع فى عدد الخميس 28 يناير 2010 ) .. الحكومة قالت خلاص أحنا نشجع الشباب بالعمل والسكن علشان يهاجروا لسيناء ،ويستوطنوها ، وفى نفس الوقت يفضوا مكان فى الوادى المزنوق (القاهرة والإسكندرية والمدن والقرى المصرية الأخرى ) .. الشباب الغلبان صدق الكلام .. وجاءوا وهم مليانين بالأمل والأحلام ..
وبقية الحكاية معروفة .. لا وجدوا عمل حقيقى يؤمن حياتهم .. ولا المرتب بيكفى عيشه كريمة .. وشركات البترول فى سيناء لاتعطى وظائف إلا لصاحب واسطة كبيرة من نائب بالمجلس الموقر وطالع ، والسكن للواسطة والمحسوبية .. ورغم محدودية المساكن اللى بتتبنى سنويا فهى مقسمة كما يلى 50 % للأهالى من البدو ..و 25% لموظفى الحكومة والمحليات ..و17 % حصة المحافظ يوزعها بمعرفته ..((و8% للشرطة والقطاع الخاص ودول بيمثلوا 70% من السكان )) .. يعنى لو غلبان ومالكش ضهر أنسى أنك تاخذ شقة غرفة أو غرفتين وصالة وعفشة مية !!..ده غير الشروط التعجيزية .. كأن يكون لدى الشاب إقامة رسمية موثقة لمدة 15 سنة على الأقل !!! ورجع ياولداه نص الشباب وقالوا ياعم بلاش بهدله وأحسن نتبهدل وسط أهلنا .. والنص التانى اللى شايف البهدلة هنا وهنا زى بعضها وآهى كلها بهدلة !!... قال أصبر شوية !! .. يمكن ييجى الفرج من عند ربنا .. وأبتدأوا يسكنوا فى بيوت رخيصة على قدهم .. بدون مياه .... والكهرباء بتقطع.. مش مشكلة ماهى بتقطع فى مصر كلها !! مافيش عفش وراضيين وحامدين ربنا .. المهم حته الواحد يريح فيها جتته !! .. وتيجى السيول وتشيل البيوت البسيطة واللى أبسط من أصحابها اللى بنوها فى مجرات السيول .. والأبسط منهم اللى مالقوش أرخص منها يسكنوا فيها !!.... ويشيل السيل كل المقتنيات البسيطة للشباب اللى مالقوش أرخص من كده .. و المفاجأة العجيبة إنه فى تانى يوم للسيول وبدون سابق إنذار .. تتفتح أبواب الأمل بالبدء فجأة فى تنفيذ برنامج الرئيس الأنتخابى بتخصيص أراضى للشباب ..( مشروع أبنى بيتك ) كل شاب 150 متر .. حايبنى على 40% من مساحة الأرض .. يعنى على 60م فقط .. وحايدفع فى المتر أكتر من اللى بيدفعه المسثمر الملياردير .. وبرضه الحمد لله ..ويبوسوا أيدهم وش وضهر .. وباب الأمل ده مفتوح كام يوم ياجماعة الخير .. 5 أيام فقط من الأحد للخميس.. تخيلوا !! وبرضه ماشى الحال .. ويجرى الشباب على أماكن توزيع الأستمارات .. فيجد أنه
لابد أن يثبت بالمستندات الحكومية أنه مقيم من 15 سنة فى سيناء ( طيب أزاى إذا كان عمره من 20-30 سنة !!.. وماكنش فيه ولا مدرسة ثانوى واحدة فى كل مدينة !!.. ومدرسة واحدة إعدادى !! و2 أبتدائى ) (( وأنا شاهد على ذلك )) قلنا خلاص يقدم الأب أو الأم الأرملة مايثبت إقامتهم من 15 سنة وبالتالى الأولاد مقيمين معاهم .. البيروقراطية قالت لأ !! .. لازم تكون الأقامة للشاب نفسه .. ( كده يبقى أستبعدنا 70% من الشباب ) ويبقى الشباب المحظوظ ومقيم فعلا .. يجرى على السجل المدنى الوحيد بالمدينة .. يلاقى الموظف عنده تعليمات مايعطيش بيانات بالأقامة .. ولازم يذهب لمدينة الطور على بعد 200 كيلومتر علشان يجيب موافقة على أعطاؤه بيانات إقامته .. فيركب الشاب أتوبيس الفجر علشان يلحق المواعيد الرسمية ويقدر يجيب البيانات .. فيفاجأ بالمسئول يبلغه أنه ممنوع إستخراج البيانات دى دلوقت بالذات لأن هناك الآلاف اللى بتطلب البيانات دى!!.. وأشمعنى اليومين دول يعنى أتشمللتوا وطالبين إثبات الإقامة ؟ وماطلبتتوهاش ليه من بدرى ؟؟.. يبقى عندكم أغراض خبيثة وهى الحصول على أرض!! طبعا ياغبى أمال أحنا مقدمين الطلبات ليه ماهو علشان الأرض اللى حانبنى عليها بيت صغير ونعيش ونستقر ونحقق الهدف القومى ببناء حائط بشرى من الناس ضد أى أطماع أو حروب أو غزوات متوقعة !!.. ويرد المسئول بكل بجاحة وغباء وقلة ذوق .. وقلة فهم أو وعى قائلا : آسف ممنوع !!!!.. ويعود الشباب وهو يجر أذيال الخيبة .. وقد جرفت سيول البيروقراطية أحلامه وأمانيه .. بعد أن جرفت سيول المياه سريره وبيجامته وشبشبة !! عارفين عدد سكان جنوب سيناء بمدنها الثمانية كام نسمة ؟ مش حاتصدقوا !! ( البدو والحضر والأجانب المقيمين .. 154 ألف نسمة حسب آخر إحصاء رسمى لجهاز الأحصاء .. يعنى أقل من سكان أى شارع فى شبرا أو أمبابة .. وبقية سيناء صحراء فاضية قاحلة .. ياترى محجوزة لمين ؟؟ .. ماحدش عارف ! خاصيمكم النبى كفاية كده .. وكفاية السيول اللى غرقتنا .. وماتغرقوناش أنتم بسيول بيروقراطيتكم .. وغبائكم..وجهلكم .. ونرجوكم تعيدوا النظر .. وكفاكم قتلا فى أمانى وأحلام شبابنا المصريين فقد طفح بهم وبنا الكيل .
بقلـــــم
صــلاح إدريس
salahedris@gmail.com