سر الحبل الصرى !!!

سر الحبل الصـــرى !!
ــــــــــــــــــــــــــــــــــــــــــــــ

رقم الموضوع :- ( 30 )
التاريــــــــخ :- الثلاثاء 16 فبراير 2010
أسم الموضوع :- سر الحبل الصــرى !!
أسم الكاتب :- صــلاح إدريـــس
التصنيـــــف :- معرفى

******************

سر الحبل الصرى !!
ــــــــــــــــــــــــــــــــــ
النهارده حاألبس البالطو الأبيض ..وأتقمص دور الطبيب .. ! لأ وأيه طبيب عالم كمان !!.. والحكاية إن فيه أكتشاف طبى جديد حايساعد بدون شك فى شفاء 90 % من الأمراض المزمنة والخطيرة إن لم يكن كلها .. وطبعا الشفاء هو من عند الله.... قال تعالى:
" وننزل من القرآن ما هو شفاء ورحمة للمؤمنين "
صدق الله العظيم.

وأنا عايز أشرح لكم ببساطة شديدة أهمية هذا الأكتشاف الطبى .. و الفكرة ببساطة أن الخلية الجذعية .. وهى خلية المنشأ أو الأصل .. تقدر تعطى أى عضو فى الجسم لما تتفك شفراتها المغلقة ، يعنى حاجة كدة زى مخزن إلهى طبيعى للإستعانة به فى علاج أو إستكمال أى نواقص بالجسم البشرى ..وأفضل هذه الخلايا موجودة فى ( الحبل الصرى) .. اللى بيتولد به الجنين ( ويقال عليه الحبل السرى والأصح الحبل الصرى ) .. لأنه بيكون موصولا بصرة الجنين .. وهو الحبل الموصول بين الجنين والأم .. ويتم قطعه بعد الولاده مباشرة .. و (الحبل الصرى ) ده أهم مخزن للخلايا الجذعية بشرط أن يتم قطعة والأحتفاظ به فى خلال الدقائق الخمس الأولى من الولادة ، وأصبح لدينا الآن فى مصر بنوك لحفظ هذا الحبل .. وحفظه سيكون لك وبأسمك لأنك أكثر واحد ممكن يستفيد منه .. وعندما يكبر الشخص أو حتى وهو صغير وأصيب بمرض خطير - لاقدر الله - .. يمكن فتح هذا المخزن وأخذ جزء من الخلايا الجذعية دى من ( الحبل الصرى ) ويمكن بها علاج هذا المرض الخطير أو ذاك .. طبعا هناك تحديد للأمراض وتحديد للخلايا الجذعية وخواص كل جزء محدد منه لهذا المرض تحديدا دقيقا .. يعنى ماينفعش مثلا يتقطع حته من الخلايا الجذعية دى لشفاء أى مرض .. لأ طبعا !!.. فالخلايا الجذعية دى متحددة بتسلسل طبى معروف .. كتسلسل رقمى مثلا من (1 – 1000) ..وكل سنتيمتر أو ملليمتر أو رقم من هذا التسلسل من الخلايا الجذعيه دى بتعالج مرض محدد .. يعنى مثلا الرقم 5 فى التسلسل .. بيعالج أمراض الكبد .. والرقم 14 بيعالج أمراض القلب ..وهكذا ... وسبحان الله أن الأبحاث المتقدمه على هذه الخلايا الجذعية بتقول أن المخزن الألهى ده فيه علاج كل الأمراض .. ولكن حتى الآن فى مصر لا تنفع هذه الخلايا الجذعية إلا فى علاج مرض سرطان الدم ..وأنيميا البحر المتوسط، .. والمدهش أن حالات العلاج لسرطان دم الأطفال فى مصر بأستخدام الخلايا الجذعية أو بتسمية أخرى زرع النخاع .. نجحت بنسبة قاربت 100% .. وبقية الأمراض لسه تحت البحث .. وكل يوم بيكتشفوا جديد .
لكن فى أوروبا وأمريكا والصين تقدمت أبحاث الخلايا الجذعية دى ، وأهم أمراض قطعت فيهما الأبحاث أشواطاً طويلة هما مرض السكر .. وجلطة القلب التى تليفت بعدها العضلة ، ولكن هنا فى مصر النجاح لسه محصور فى أمراض الدم المذكورة .. والنصيحة الهامة جدا دلوقت هى أنه لابد على الأم الذاهبة للولادة أن تحتفظ ( بالحبل الصرى ) وتضعه فى الكيس المخصص له فى بنك الخلايا الجذعية .. فى خلال خمس دقائق من الولادة ، وألا تلقى به فى سلة المهملات لأنها بذلك ترمى كنزاً فى المجهول وتضحى بثروة .. وعطية عظيمة ربنا وهبها لنا على قارعة الطريق!!! يارب أكون قدرت أوصل الأكتشاف الهام ده ببساطة .. ودلوقت أسمحوا لى أن أخلع البالطو الأبيض .. وأرجع زى ماكنت .. وأرجو أن يصحح لى أى من أطبائنا العلماء أى خطأ غير مقصود فى معلوماتى دى .. أو إضافة تفاصيل أكثر .. وتوضيح أشمل .
بسم الله الرحمن الرحيم
( قَالُواْ سُبْحَانَكَ لاَ عِلْمَ لَنَا إِلاَّ مَا عَلَّمْتَنَا إِنَّكَ أَنتَ الْعَلِيمُ الْحَكِيمُ (
بقلــــم
صــلاح إدريــــس
salahedris@gmail.com
نشرت فى عمودى الأسبوعى ( بالبلدى الفصيح ) عدد السبت 6 فبراير 2010