السماح .. ياست الملاح .

السمــاح ياست المــلاح .
ـــــــــــــــــــــــــــــــــــــــــ

رقم الموضوع :- ( 23 )
التاريــــــــخ :- الأحد 24 يناير 2010
أسم الموضوع :- السماح ياست الملاح ..
أسم الكاتب :- صـلاح إدريــس
التصنيـــــف :- مقال ساخر
**********************

أهلى وناسى وأصدقائى الأعزاء ..

مقالتى دى مخصصة للسيدات فقط .. فلو كنت راجل من فضلك إخلع أنت .. خلعت .. خلاص .. طبعا ياصديقاتى العزيزات .. أنتن فاكرات الموضوع اللى كتبته من شهرين ..تلاتة فى جزأين بأسم ( الزوجة النكدية ) .. وشرحت فيه التعريف والشكل للزوجة النكدية ... وكان المقال ده أكثر مقال وصلتنى عليه مشاركات طوال حياتى .. وكأننى قبل كده كنت بأتكلم هيروغليفى !.. والمقال ده بالعربى !!.. المهم ياأخواتى وبناتى أن كلكن( تقريبا ).. طالبتن بالكتابة عن الزوج النكدى .. وحاولت أن أكتب عن هذا الزوج ..مع الألتزام فى العدالة بالطرح .. يعنى يكون بنفس القوة .. والطرافة لمقال الزوجة .. ولكنى فشلت للأسف .. يمكن لأنى راجل !! ومش حاسس بعيوبى ! .. ويمكن الرجاله النكديين ..مش نكديين قوى يعنى .. أو قدرتهم على التنكيد ضعيفة عن قدرة الستات .. أو يمكن قلبى ماطاوعنيش !! و لما أحترت قلت لنفسى أأجل الموضوع ده شوية .. وإذا كانت بنات حواء ناويات تأخذن بالتار .. يبقى لازم واحدة منهن هى اللى تكتب الموضوع ده .. وبوجهة نظرها هى .. ومن يومين .. لقيت جريدة المصرى اليوم – عدد الجمعة 22 يناير .. كتبت موضوع عن الرجالة والستات .. والكلام كتير .. ولكنه عادى .. لكن اللى مش عادى هو نموزج وضعته المسئولة عن ملحق ( طعم البيوت ) بالجريدة .. وهى صحفية ممتازة أسمها ( مى عزام ) .. عملت أيه الست مى عملت نموزج عبارة عن تصريح .. حاأسيبكم تشوفوه بنفسكم .. وعايزكن تشاركن برأيكن فى الموضوع .. ولو فيه رجاله تسللت للمقال ( رغم تحذيرى ) فلا مانع من المشاركة .. وخلونا نخرج شوية من القتامة اللى زادت مع العام الجديد .. ويارب يخيب ظننا .. ويكون عام أحسن من اللى فات .. ياللا .. أقرأو التصريح .. ومنتظر رأيكن .. ورأيكم .. وواصلوا لنتواصل .
**********************************************************************************

السلطة العليا والحكومة
قسم تصاريح الخروج
نموزج 35أ2/5/258

طلب تصريح خروج من المنزل

زوجتى العزيزة الحبيبة ..................................
أنا زوجك الموقع أدناه ...................................
أرجو منكم الموافقة الكريمة على طلب تصريح خروجى من المنزل فى يوم ... الموافق .../.../..............
من الساعة ...ر... إلى الساعة ...ر...
كما أتعهد لكم بصفتكم السلطة العليا فى المنزل ، بعدم إرتكاب أى محظورات .. خاصة النسائية ، على أن أعود فى الوقت المحدد لإنتهاء التصريح .. محتملا أى عقوبة تنص عليها لائحة العقوبات أدناه .
التوقيع
................
الزوج المخلــص
ـــــــــــــــــــــــــــــــــ

لائحة العقوبات
ــــــــــ
1- نوم إنفرادى وبدون عشاء لمدة ( 4 أيام ) على أن تكون بدايتها يوم خميس .
2- قطع المصروف اليومى لمدة ( 10 أيام ) .
3- منع المكالمات المنزلية لمدة ( 30 يوما ) .
4- تكشيرة صباحا ومساءا لمدة (60 يوما ) .
5- المنع من مشاهدة القنوات الفضائية ،ويلتزم الزوجد المعاقب
بمشاهدة قنوات اليمن ،وأثيوبيا،وموريتانيا لمدة(60 يوما )
6- زيارة أم الزوجة لمدة ( أسبوع ) فى منزلها (إقامة كاملة ) وترد الحماة الزيارة لمنزل أبنتها ( منزل الزوجية ) لمدة ( 15 يوما ) ( إقامة كاملة ) .
7- إستلام الأعمال اليومية المنزلية لمدة ( 14 يوم ) (( طبخ +
مسح بلاط + غسيل ملابس + تنشيرها وجمعها وكويها )

بقلــــــم
صـــلاح إدريــــــس

شكرا استاذ صلاح على الموضوع التريف
لكن اسمحلى اقولك ان فى الزمن ده مهما كانت الزوجه بتتحكم فى زوجها استحاله تعرف تعمل لائحه عقوبات بهذه الطريقه ولا يوجد رجل واحد فى الدنيا مهما يخاف من زوجته بس بردو جوه دم حامى والزوج اللى بيسمع كلام زوجته وبيخاف منها بتكون زوجته بتكلم معاه بسياسه لان الرجل بطبعه عنيد والاسلوب الوحيد اللى ينفع معه هو السياسه بس
وشكرا مره اخرى على الموضوع الجميل

شيكو النوبية ..

صدقينى ياشيكو .. فيه ستات كتير بتعمل أكتر من كده .. ورجاله كتير بتقبل أكتر من كده .. وخللينا نشوف لما تتزوجى حاتعملى أيه ؟ بس طبعا ده حايكون بعد سنة ولا أتنين من الزواج .. دمت لى ياشيكو .. وواصلى لنتواصل .

عدد المساهمات : 30 نقاط : 37 الانتساب : 11/01/2010

استاذ صلاح
بجد كل مواضيعك مميزه زي ما عودتنا ديما ومستنين مزيد من المواضيع الهامه

بنت كنزية ..

أشكر لك كريم مرورك .. ورقيق كلماتك .. دمت لى ولأسرتك بكل خير .. وواصلى لنتواصل .